CAGAYAN DE ORO CITY-Gimanduan karon ni Iligan City Mayor Celso Regencia ang Muslim leaders nga kanunay makig-koordinar sa kapolisan batok sa hadla sa terorismo.
Kini human gipatawag ni Regencia ang 80 ka lideres ug mga administrador sa relihiyong Islam tungod sa report nga nang-recruit na ang Maute-ISIS group sympathizers bugti sa 30-mil pesos nga bayad.
Gibutyag ni Regencia nga gipasiguro niini kang Iligan City Police Director Sr Supt Leony Roy Ga nga masikop ang local recruitters nga mikumbinser sa pipila ka Muslim leaders aron mopasakop sa mga terorista.
Dumduman nga gibutyag kaniadto ni AFP chief of staff General Eduardo Año nga nabawi nila ang video footage diin gisulti sa mga terorista nga atakehon usab nila ang Iligan City kon milampos kini pag-okupar sa Marawi City.
