CAGAYAN DE ORO CITY – Gisaksihan sa libuang residente ug mga bisita ang tinuig nga civic military parade ug flute competitions nga apil sa dinagkong kalihukan sa bespiras sa kapistahan sa dakbayan sa Agosto 28 ning tuiga.
Gipanguluhan ni City Mayor Rolando ‘Klarex’ Uy ug ubang city government officials ang parada nga nanukad sa Rodelsa Circle sa Barangay Macasandig nga misubay sa dalang Velez-Recto Avenue ug tapuson sa Limketkai area sa dakbayan karong adlawa.
Gipasayuhan sa mayor ang pagparada sa sobra 150 ka contingents aron dili grabe ang pagkabulad sa init sa mga partisipante ilabina sa kabataan gikan sa nagkadaiyang pribado ug publikong mga tunghaan sa syudad.
Gipangunayan usab sa alkalde ang pag-welcome sa matag-parade contingent paghidangat sa Limketkai complex kuyog ang ubang mga opisyal sa kagamhanan.
Samtang anaa ang ka-aligre sa kalihukan, giputlan una sa National Telecommunication Commission 10 sa linya sa komunikasyon ang katawhan nga nakabase sa mga lugar nga agian sa parada.
Kini sa katuyuan nga luwas ang tanang parade participants,manan-away ug mga bisita nga naki-piyesta sa dakbayan ning tuiga.
Sa dili pa matibawas ang parada,gilayong i-anunsyo usab kon kinsa ang flute contigents nga mangdaug nga dunay dagkong premyong cash nga itunol ang city govt.
Hisayrang ang parada ning tuiga ang tipik sa daghang mga kalihukan nga gipangunayan pagdumala sa city govt.
