CAGAYAN DE ORO CITY – Natumbok na sa kapolisan ang pipila sa mga suspek nga responsable pagtulis sa bodega sa bugasan nga gipanag-iya sa negosyanteng Taiwanese national diha sa Zone 10,Upper Zayas, Brgy Carmen sa syudad sa miaging gabii.
Gibutyag ni Carmen Police Station commander Maj Marion Mantala Jr nga walay hunong ang paglusad nila sa paggukod hangtod nga mabungkag ang maong grupo.
Miingon si Mantala nga hayan sulod ning semanaha,mapasaka na ang kasong pagpanulis sa piskalya batok sa upat ka armadong mga suspek nga mitulis sa sobra 600-mil pesos nga kinitaan sa biktima.
Samtang nagtoo si City Police Director Col Aaron Mandia nga usa ka grupo lamang sa mga tulisan ang mitira sa bodega sa bugasan sa negosyanteng Taiwanese national ug sa gasoline station sa Brgy Puerto ning syudad sulod ning bulana.
Kini human dunay panagsama sa pipila ka bayhon ang mga nakataptap nga mga suspek nga na-captured sa CCTV camera sa maong magkalahi nga pagpanulis.
Gibutyag ni Mandia nga dili high profile robbery gang ang maong grupo apan gitahas niini sa iyang mga kumander pagsulbad sa duha ka pagpanulis sa dakbayan.
Hisayrang sa pagtulis usab sa gas station sa Brgy Puerto niadtong Hulyo 2,sobra 200-mil pesos ang nadala sa mga tulisan.
