CAGAYAN DE ORO CITY – Maapektuhan ang alokasyon alang sa mga proyekto ug ubang ekonomikanhong interes sa Mindanao sa pagkanaug ni Senador Migz Zubiri isip presidente sa senado.
Kini human kudetaha sa 15 ka senador ang liderato ni Zubiri ug gipahulip si Sen Francis Escudero sa pagtoo sa pipila nga mapatughan ang executive agenda ni Pres Bongbong Marcos.
Namahayag si Misamis Oriental 2nd District Cong. Bambi Emano nga dakong bintaha kon bisaya o taga-Mindanao ang nangulo sa senado kay dili usab madehado ang tinuig nga pondo nga mahatag niini.
Obserbahan usab sa kamarabaha ang istilo sa liderato ni Escudero sanglit naglaum si Marcos sa kooperasyon niini sa iyang priority govt program agenda.
Miklaro usab si Emano nga dili bag-o kanila si Escudero kay sayod sila sa abilidad niini sanglit nahimo kining kongresista ug gobernador sa ilang probinsya sa Sorsogon.
Hisayrang si Emano ang kasamtangang nangulo sa Mindanao Affairs Committee diin nag-unang tuyo ug trabaho ang pagsiguro nga makabaton sa patas nga pondo ang isla aron dili uwahi pag-abot sa mga kaugmaran ngadto sa Visayas-Luzon-National Capital Region budget allocations.
