Hugot nga gikondinar ni Mamamayang Liberal Party-list Representative Leila de Lima ang mapihigong paghulagway sa mga Pilipino isip mga onggoy sa usa ka kontrobersyal nga bidyo gikan sa state-controlled media outlet sa gobyerno sa China, ang China Daily.
Sumala ni De Lima, kining bastos nga caricature nagpadayag lamang sa naghinobrang garbo sa China ug sa ubos kaayong pagtan-aw niini sa dignidad sa mga Pilipino.
Iyang gipasabot nga ang maong lakang nagbutyag usab sa kapakyasan ug kahadlok sa China tungod kay ang Pilipinas dili na moduko ug padayong nanalipod sa iyang soberanya sa West Philippine Sea.
Gipamugos pa sa kongresista nga bisan pa nga magpakaylap ang Beijing sa mga bakak nga AI-generated videos, dili gayod nila mapapas ang kamatuoran nga iya sa Pilipinas ang maong teritoryo ubos sa balaod sa nasod ug sa tibuok kalibotan.
Tungod niini, iyang gidasig ang tibuok katawhan nga dili mahadlok ug padayong mobarog aron panalipdan ang nasudnong dungog batok sa bisan unsang panggigipit sa mga bully.
Ang maong racist nga binuhatan sa China Daily nakakuha usab sa lapad nga pagsaway gikan sa nagkalain-laing sektor sa kagamhanan sa Pilipinas nga mibarog batok sa malisyosong propaganda sa Beijing.
