Gibutyag sa Médecins Sans Frontières o MSF nga usa sa matag duha ka bata sa mga displacement site sa Baidoa, southwestern Somalia, ang adunay acute malnutrition, samtang usa sa matag upat ka bata ang adunay severe acute malnutrition.
Mas nakapasamot pa sa kahimtang sa mga pamilya sa maong mga lugar ang nagkagrabeng huwaw, diin usa sa matag tulo ka pamilya ang gikareport nga kausa lamang mokaon kada adlaw.
Tungod sa pagsaka sa kaso sa malnutrisyon ug mga sakit sama sa tipdas, napugos ang mga pasilidad panglawas nga gipadagan sa MSF sa pag-atiman og mas daghang pasyente, nga milapas na sa ilang naandan nga kapasidad.
Samtang, kapin 80 porsyento ang pagkunhod sa pondo alang sa mga programa batok sa acute malnutrition sa pipila ka bahin sa Somalia karong tuiga, bisan pa sa nagkadaghang mga bata nga nanginahanglan og pagtambal.
Nanawagan ang MSF sa internasyonal nga komunidad nga molihok dayon ug dugangan ang humanitarian assistance aron matubag ang nagkagrabeng panginahanglan ug malikayan ang mas grabeng kagutom ug posibleng mas dako nga humanitarian disaster sa Somalia. (jane abulag)
