Maleksyon na ang mga magbabalaod sa paghatag sa confidential funds (CFs) sa mga civilian agency sama sa Department of Education ug sa Office of the Vice President tungod sa nagligid nga impeachment.
Kini ang nakita ni Atty Oscar Moreno, magtutudlo sa Abogasiya sa Ateneo de Cagayan Colleg of Law ning syudad.
Miingon si Moreno sa BOMBO RADYO nga gikan man sa kongreso ang pag-uyon nga hatagan sa CFs ang DepEd ug OVP, busa, aron walay mawaldas nga salapi gikan sa mga accountable officials sama ni Vice President Sara Duterte, sila na mismo ang muputol niini.
Gipahayag ni Moreno nga lisud kaayong sigurohon ug i-establisar ang isyu sa accountability kon confidential funds ang hisgotan.
Iyang gipasabot nga bisan pa man kon nakadepende kini sa prinsipyo sa pagkaresponsabli sa padulngan sa salapi, nagpabilin nga misteryoso ug lisud subayon ang pamaagi sa paggamit sa maong pundo sa ngalan nga kini “confidential in nature” o sensitibo nga mga impormasyon.
Gidugang usab smagtutudlo nga bisan dili man kini ang sentral nga isyu sa impeachment, naglaum gihapon siya nga magbaton sa pagbag-o o reporma sa pagdumala niini.
Gihimo ni Moreno ang pahayag tungod sa ilusad nga deliberasyon sa badyet sa gobyerno alang sa fiscal year 2027 nga mao magsilbing unod sa National Expenditure Program o NEP sa 2027.
