CAGAYAN DE ORO CITY – Patay sa pagpamusil gumikan sa bangi ang night life goer samtang nag-inom kuyog ang mga barkada sa usa ka imnanan mismo sa Corrales Avenue,Brgy 29 ning syudad kaganihang kadlawon.
Giila ni Cogon Police Station deputy commander Lt Arleigh Cardinal ang biktima nga si Avelino Majorenos,28 anyos,minyo nga taga-lungsod sa Opol,Misamis Oriental.
Gibutyag ni Cardinal nga dunay gikabikil nga laing grupo sa mga mang-inumay ang biktima nga nag-resulta sa ilang pagsumbagay ug pagpamusil paggawas pag-abot niini tungod sa DTI building.
Miingon si Cardinal nga migamit sa kalibre 45 nga armas ang wala mailhi nga suspek sa pagpusil-patay sa biktima subay sa narekober nga slug sa mga bala sa crime scene.
Mihimo pa sa dugang pag-imbestigar ang kapolisan sa hitabo.
Sulod ning semanaha,mibati’g ka-alarma ang pipila sibilyan tungod sa sunod-sunod nga kamatay sa syudad nga naglakip sa patulis ug dunggab-patay sa grab delivery driver sa coastal road sa Brgy Lapasan ning syudad.
Sa pikas bahin,gibarugan ni Police Regional Office 10 regional director Brig Gen Benjamin Acorda Jr nga pabiling ubos ang katibuk-ang crime statistics sa dakbayan.
Kini bisan kon dunay sunod-sunod nga natigayong kremin nga naglakip sa pagkadunggabi-patay pipila ka parking boys ug pinakaulahi ang pagpusil-patay sa night life goer sa Corrales Avenue ning syudad kaganihang kadlawon.
Gibutyag ni Acorda nga tinood nga dunay pipila ka henious crime nga natala sa dakbayan apan wala kini nagpasabot nga nagsaka na ang crime statistics niini.
