CAGAYAN DE ORO CITY-Gusto si Oroquieta City Mayor Jason Almonte nga personal ikatubang si President Rodrigo Duterte aron limpyohan ang iyang pagkatawo sa pagsilbing anaa sa narco-politician list.
Kini human kabahin si Almonte kuyog sila si Sinacaban Mayor Cresenciano Mahilac; Clarin Mayor David Navarro ug Calamba Mayor Ezel Villanueva gikan sa Misamis Occidental nga gibulgar ni Duterte nga utok sa pagkuyanap sa ilegal nga droga sa nasud.
Miingon si Almonte nga unta pinaagi sa Bombo Radyo matabang kini ikaatubang ang law enforcement agencies nga maoy naghatag impormasyon kang Duterte nga anaa siya sa kalambigitan sa ilegal nga droga.
Samtang suportado ni Misamis Occidental 2nd District Rep Henry Oaminal ang paglugwa sa pangalan sa upat sa ilang mga mayor nga gitumbok nga anaa sa listahan sa narco-politics ni Duterte.
Miingon si Oaminal nga gikadismaya niini nga natumbok ang iyang mga kaubang opisyal sa listahan ni Duterte apan katungod kini sa gobyerno aron masumpo ang ilegal drug operations nga gilambigitan sa mga politiko sa nasud.
Samtang walay bisan kinsa nga makapugong sa kandidatura sa mga politiko bisan nga nalakip ang ilang pangalan sa gipalugwa nga ‘narcolist’ ni Duterte.
Gibutyag ni Comelec spokesperson James Jimenez nga dili mahimong basehan ang ‘narcolist’ aron e-disqualify ang usa ka kandidato gawas lamang kon konbiktado kini sa usa ka kaso.
Matud ni Jimenez nga magsilbi lamang nga ‘voters education’ ang ‘narcolist’ nga gipalugwa sa presidente.
Giangkong sa maong tigpamaba nga disbentaha kini sa kandidatura sa mga nalista.
