Napatug-an sa korte sa usa ka testigo ug kanhi District Engineer sa Department of Public Works and Highways (DPWH) Bulacan nga si Henry Alcantara nga miabot sa P90 milyon ang gi-ingong “kickback” fee nga ilang nakolekta alang kang kanhi senador Ramon “Bong” Revilla Jr. nga may kalabotan sa usa ka flood control project sa Bulacan.
Gibutyag ni Alcantara nga gisugo siya sa iyang kanhi “boss” nga si kanhi Public Works Undersecretary Roberto Bernardo nga mangolekta sa maong kantidad gikan sa mga contractors.
Ang salapi gikuha gikan sa advance payments ug gipadala kuno sa usa ka hotel sa Roxas Boulevard pinaagi sa iyang driver.
Siya miingon nga anaa sa P90 milyon ang ilang natigom ug gibutang sa upat hangtod lima ka bank boxes nga adunay sulod nga tag-P20 milyon ang matag usa.
Apan, aduna pay usa ka testigo ang miingon nga dili niya mahinumduman kung direkta ba gyud nga nadawat ni Revilla ang tibuok kantidad.
Dugang pa ni Alcantara, siya ang mipirma sa mga dokumento nga nag-autorisa sa bayad alang P92.8 milyon nga flood control project sa Pandi, Bulacan, bisan pa nga wala siya mismo nag-inspeksyon sa proyekto.
Nisalig lang daw siya sa mga report sa iyang mga subordinates nga nag-ingon nga hapsay ang nahuman nga proyekto.
Gipakita usab kaniya ang mga litrato isip ebidensya nga tapos na ang trabaho, mao nga napugos siya sa pagpirma sa mga dokumento.
