Nagpasidaan si US President Donald Trump nga posibleng iyang pugngan ang pag-abli sa hapit na mahuman nga Gordie Howe International Bridge nga nagdugtong sa Detroit, Michigan ug Windsor, Ontario, kon dili daw makompensahan ug matarong ang Estados Unidos sa Canada.
Ang $4.6 bilyon nga tulay kasagaran gipondohan sa Canada ug gilauman nga maablihan sa sayong bahin sa 2026 aron mapaspas ang cross-border trade ug biyahe tali sa duha ka nasod.
Matod ni Canadian Prime Minister Mark Carney, nahisgutan na nila ni Trump ang maong isyu, ug iyang gipatin-aw nga ang Canada maoy nagpondo sa proyekto, samtang kauban ang estado sa Michigan sa pagpanag-iya niini.
Gipasidan-an sa mga kritiko nga ang paglangan o pagpugong sa pag-abli sa tulay makadaot sa ekonomiya, supply chain, ug sa dugay nang relasyon tali sa Estados Unidos ug Canada. (Phillip Ariata)
