Nagtuo si Akbayan Representative Chel Diokno nga ang pagpahugot sa balaod sa armas o ‘gun laws’ ug dili ang pagpaubos sa age of criminal liability ang angayng tutokan human sa nahitabong pagpamusil sa mga menor de edad sulod sa usa ka tunghaan sa Tacloban City.
Sumala ni Diokno, gawas sa duha ka suspetsado nga nag-edad og 14 ug 15 anyos, kinahanglan usab nga imbestigahan ang ilang mga ginikanan aron matino ang ilang tulubagon ubos sa Juvenile Justice Law base sa gidak-on sa ilang pagpasagad.
Gipasiugda sa magbabalaod nga kinahanglan hatagan og mas bug-at nga silot ang mga tag-iya og pusil nga nagmando o nagpasagad nga makahupot og armas ang mga bata.
Mahinumduman nga tulo ka estudyante ang namatay samtang kapin sa 20 ang nangaangol human gipaulanan og bala sa mga estudyanteng suspetsado ang San Jose National High School.
