Pabor si kanhi Speaker ug Leyte Representative Martin Romualdez sa pagrepaso sa mga polisiya aron masiguro ang mas luwas nga paggamit sa social media sa mga menor de edad.
Matud pa ni Romualdez, responsibilidad sa gobyerno, mga eskwelahan, mga ginikanan, ug sa matag Pilipino ang pagpanalipod sa kaluwasan sa mga kabataan sa online nga kalibotan.
Gipasiugda usab niya nga sensitibo pa ang panghunahuna sa mga bata ug dali silang maimpluwensiyahan sa mga makita sa internet.
Tungod niini, gikinahanglan ang lig-on ug epektibong mga regulasyon aron dili sila mabutyag sa makadaot nga sulod sa social media ug uban pang online platforms.
Dugang pa niya, dili na angay hulaton ang sunod nga trahedya sa dili pa aksyunan ang mga kakulangan sa kaluwasan sa mga eskwelahan, suporta sa mental health, ug mga lakang sa pagpanalipod sa mga bata.
Nagtuo si Romualdez nga ang maong pagrepaso sa mga polisiya usa ka hinungdanong lakang aron mas mapalig-on ang pagpanalipod sa kaayohan ug kaugmaon sa umaabot nga mga henerasyon.
