CAGAYAN DE ORO CITY, Philippines – Mi-apelar ang Commission on Elections sa Philippine National Police sa hinanaling pagresolbar sa kasong pagpatay sa vice mayoral candidate sa South Cotabato.
Namahayag si COMELEC Chairman Atty George Erwin Garcia nga dili siya manginlabot sa imbestigasyon sa PNP apan maghulat sila sa resulta sa kaso aron dunay lig-ong basihan nga ma-plastar ang probinsya sa Red Code o Critical Areas.
Base sa Omnibus Election Code dunay managlahing kategorya o security measures ang komisyon aron maprotektahan ang ipatuman nga election period, sugod Enero 2025.
Migamit ang komisyon sa color coding aron mapaniguro ang kahusay ug kalinaw sa tibook Pilipinas.
Kini gilangkoban sa green, yellow, orange, ug red.
Ang tanan syudad ug probinsya nga ubos sa Green Category nagpasabot nga luwas sa political tension.
Ang Yellow code nagpasabot nga dunay kasaysayan sa political violence ang usa ka lugar.
Ang Orange code nagpasabot nga dunay presensya sa private armed groups (PAGs) ang usa ka lugar nga posibleng hired killer or goons nga kasagaran gamiton sa usa ka politiko.
Samtang ang CODE RED nagpasabot nga dunay kaso sa pagpatay sa mga kandidato o duguong bangi sa mga nandagan nga mga pulitiko.
Una niini, nagpagawas na si South Cotabato 2nd District Rep. Peter Miguel sa 1 Milyon pesos reward money sa makatudlo sa mastermind sa paglikidar kang Tantangan vice mayoral aspirant Jose Osorio.
Unang napalgan ang lawas ni Osorio nga napuno sa dugo ug nagbuy-od sa dalan sa Barangay Bukay Pait.
Nagsilbing barangay chairman si Osorio sa maong lugar ug gihugon-hugon nga may taas nga tsansa nga mahimong sunod nga bise mayor sa Tantangan.
