Gipasabot ni Presidente Ferdinand ‘Bongbong’ Marcos nga ang gihisgutan nga “reset” sa relasyon sa China kay gibuhat aron maminusan ang tensyon ug malikayan ang bisan unsang dili pagsinabtanay sa kadagatan.
Atol sa usa ka presidential luncheon nga gidumala sa Foreign Correspondents Association of the Philippines, mipahayag si Presidente Marcos nga gikinahanglan gayod ang pagpadayon sa diplomatikong panag-istoryahanay sa matag higayon nga mosaka ang tensyon sa kadagatan.
Gipatin-aw sa Presidente nga kining maong diplomatikong pamaagi kay nagtumong sa pagpaus-os sa lebel sa tensyon aron malikayan ang mga posibleng sayop o aksidente tali sa duha ka panig.
Dugang niini, gipamatud-an usab sa presidente nga ang padayong paningkamot sa pagdumala sa maong sitwasyon nagtumong sa pag-ila sa nag-unang hinungdan sa mga bag-ong insedente nga nahitabo sa kadagatan ug sa paghimo og mga lakang aron malikayan ang pagkahitabo pag-usab niini sa West Philippine Sea.
