Gipasalig ni Presidente Ferdinand Marcos Jr. nga maghatag ang gobyerno sa suporta sa mental health alang sa mga estudyanteng naapektuhan sa kusog nga linog sa Mindanao, ilabi na sa Sarangani ug General Santos City.
Gihatagan og gibug-aton sa Pangulo nga kinahanglang matagaan og pagtagad ang emosyonal ug sikolohikal nga epekto sa kalamidad, ilabi na sa mga kabataan nga hilom nga nakasinati og trauma.
Matod pa niya, nag-andam na ang Department of Health (DOH) og mga programa aron matabangan ang mga magtutungha nga makabangon gikan sa kahadlok ug stress tungod sa trahedya.
Gihangyo usab sa Pangulo ang mga magtutudlo ug mga kawani sa tunghaan nga bantayan og maayo ang ilang mga estudyante nga nagpakita og mga timailhan sa emosyonal nga kalisod.
Mahibaloan nga aron mapalig-on kini, ipailalom sa espesyal nga pagbansay ang mga maestra aron makat-on sila sa pag-ila ug pagtabang sa mga kabataan nga nakasinati og grabehang stress ug trauma. (riza budlao)
