Pabor ang ekonomista ug si Misamis Oriental Former Vice Governor Joey Pelaez nga si Senador Rodante Marcoleta ang mahimong chairman sa sub committee, sa Senate Blue Ribbon Committee nga mutiwas sa imbestigasyon sa flood control anomaly nga wala nahuman ni kanhi Blue Ribbon Chairman Senador Ping Lacson.
Alang kang Pelaez, importante ang papel ni Marcoleta sa pagsumpay sa nasugdan nga imbestigasyon kay muhatag siyag balanse sa wala nahisgutan ug posibleng gilikayan nga mga isyu ni Lacson.
Nagtoo usab si Pelaez nga dinhi na mahitabo ang mga daghang rebelasyon nga dugay nang napugngan kay daghan man ang gatuo nga nasagulan na sa pamulitika ang imbestigasyon ni Lacson, lakip na ang natak-upan nga imbestigasyon sa Independent Commission on Infrastructure (ICI) nga gitukod ni Marcos.
Milaum si Pelaez nga mahimong apolitical ug patas ang himoong imbestigasyon ni Marcoleta ug gihulatan ang pagsaysay sa mga 18 ka kanhi Marines nga miingong nalambigit sa pagdeliber sa mga maleta nga puno sa milyones nga salapi ngadto sa mga nabahinan nga mga kongresista gikan sa pondo sa ilang flood control projects. Dakung hagit usab kang Marcoleta ang pagpabalik kang kanhi Congresista Zaldy Co ubos sa iyang liderato isip sub committee chair sa Senate Blue Ribbon.
