Gipresentar sa prosekusyon ang dokumento nga nagpakita sa pagbayad og P70,000 kang Mary Grace Piattos alang sa “Payment of Reward (Medicine).”
Base sa saysay ni kanhi COA state Auditor Roderick Wamil, apil kini sa mga acknowledgement receipts nga iyang gisusi nga may kalabutan sa P125 milyon confidential funds sa OVP para sa Disyembre 21-31, 2022 ug iyang giklaro na wala pa nila masuta kung ang giilang reward kay tambal ba mismo o uban pa, busa nangayo sila ug dugang nga mga dokumento gikan sa OVP. Dugang pa niini, migawas pud ang usa pa ka acknowledgement receipt nga nagpakita sa pagbayad og P110,000 kang “Renan Piattos para sa “Purchase of Information.”
Apan ang petsa sa dokumento kay Disyembre 2023 nga gawas na sa gilangkuban sa cash advance sa OVP para sa Disyembre 2022.
Gibarugan sa kampo ni Duterte nga usa lang kini ka pseudonym aron maprotektahan ang tinood nga pagkatawo sa nagdawat sa pondo ug miingon ang prosekusyon nga mahimo pang ipatawag si “Mary Grace Piattos” isip testigo sa mga musunod nga adlaw.
Samtang nagpabilin ang baruganan sa depensa nga wala sila masayod sa pagkatawo ni Piattos ug mibalibad sa paghimo og ekspekulasyon bahin sa maong butang. (raniel mahunyag)
