CAGAYAN DE ORO CITY –Gidid-an una ni Provincial Gov Bambi Emano ang mga deboto nga makahimo sa naandan na unta nga mga kalihukan nunot sa pagtamod sa mga mahal nga adlaw sulod ning semana santa.
Kini human nalatid sa gilugwa nga executive order sa gobernador ang daghang paglimit unta sa mga tawo nga makapadayag sa ilang pagtoong kristiyanismo aron pugngan ang pagsaka sa kaso sa COVID-19 sa lalawigan.
Namahayag si Misamis Oriental IATF spokesperson Atty Jeff Saclot nga mga santos nga misa ingon man bisita iglesia ang gitugtan samtang gawas niini,wala na’y makahimo pa’g laing mga relihiyosong kalihukan.
Samtang hayan ipatuman ni Municipal Mayor Max Seno ang total ban sa mga bisita nga mohimo’g pagkaligo sa beach ug resorts nga sakop sa lungsod sa Opol,Misamis Oriental.
Miingon si Seno nga ila kining himoon sa dili pa moabot ang adlaw’ng Domingo nga sagad modagsa ang mga tawo nunot sa pagsugat sa pagkabanhaw sa namatay’g Ginoo.
Gibutyag sa mayor nga magtigom sila ning semanaha aron gilayong mapanday ang mga gabayan nga ipatuman nga dili mahimong tinubdan sa dugang COVID-19 infections ang ilang lungsod dinhi sa lalawigan.
