CAGAYAN DE ORO CITY, Philippines – Gilugwa na sa Sugar Regulatory Administration (SRA) ang sugar order (SO) nga nagtugot sa pagsulod sa dili mosobra sa 240,000 metric tons (MT) sa imported – refined sugar sa dili pa ang Septiyembre 15.
Tumong sa importasyon ang pagsiguro nga muigo pa ang buffer stock sa asukar, sukad naapektuhan ang supply niini sa milabay’ng El Nino sa Pilipinas.
Ang SO number 5 series of 2023-2024 nga gipagawas niadtong Agosto 8 nag-ingon nga kadto lang mga traders nga misalmot sa unang programa sa SRA ang tugutan sa importasyon.
Ang kwalipikadong traders ubos sa SO-2 maka-import lamang sa dili musobra sa 176,500 MT nga refined sugar.
Samtang kadtong traders nga kwalipikado ubos sa SO-3 mahimong maka-import sa maximum volume nga 63,500 MT sa refined sugar.
Pirmado ni Pablo Azcona ang SRA administrator bag-ong kamanduan sa ahensiya.
