Gipasak-an sa patung-patong nga federal charges ang usa ka Filipina nurse practitioner sa Estados Unidos human siya gi-akusran nga utok sa dako nga healthcare fraud scheme nga midamay sa Medicare ug TRICARE sa hapit US$1 bilyon (gibanabana nga P51.6 bilyon).
Naila ang suspek nga si Marizel Yukee, residente sa Las Vegas, nga gi-isyuhan sa warrant of arrest sa United States District Court for the Southern District of Texas.
Siya gikasuha’g conspiracy to commit healthcare fraud ug wire fraud, healthcare fraud, conspiracy to pay and receive illegal kickbacks, ug money laundering.
Subay sa report sa mga federal prosecutor, gitarget sa operasyon ang mga tigulang ug pasyente nga adunay grabe nga sakit pinaagi sa paghatag og dili kinahanglan nga wound treatments, nga dayon gisingil sa mga government health programs.
Hisayran nga si Yukee nalambigit sa operasyon sa upat ka wound-care clinics sa Texas, Nevada, California, ug Hawaii, diin nagbayad sa ilegal nga kickbacks kapalit sa patient referrals.
Base sa imbestigasyon, gipapeke usab ang medical records sa mga pasyente ug naningil para sa mga serbisyo nga dili man kinahanglan, samtang nakadawat sa milyon-milyong dolyar nga kickbacks.
Gibutyag pa sa mga prosecutor nga gigamit ang nakuhang salapi sa luho sa pagpalit sa mahalong kabtangan nga naglakip sa Ferrari supercar nga nagkantidad sa labaw sa US$500,000, Bulgari necklace nga US$865,000 ang kantidad, usa ka balay sa Hawaii nga gibanabana og US$1 milyon, ug usa ka beach resort project sa Santa Ana, Cagayan sa Pilipinas nga miabot sa US$4.6 milyon.
