Tungod sa pagbasura sa Senado sa 16-vote threshold sa impeachment trial sa Bise Presidente, nagpasidaan si dating Cagayan de Oro City Mayor ug Law Professor Attorney Oscar Moreno nga posibleng ibasura lang sa Korte Suprema ang planong pag-apela sa defense team tungod kay dili pa hinog ang maong isyu.
Sumala sa legal expert, hilabihan pa ka premature o sayo ra kaayo ang pagpangayo og tabang sa labing taas nga korte tungod kay wala pa man nahitabo ang botohanay sa kaso ug wala pa matino ang resulta niini.
Matud pa sa maong abogado, nagpabilin ang prinsipyo sa separation of powers tali sa tulo ka bahin sa gobyerno, diin giisip ang impeachment nga usa ka political issue nga bugtong Senado ra ang adunay katungdanan sa pagdumala.
Subay niini, gipahayag ni Moreno nga gamay ra ang posibilidad nga manghilabot ang Korte Suprema gawas kon adunay mapakitang grave abuse of discretion o grabeng paglapas sa gahum nga gihimo sa Senado.
