Nanawagan ang Philippine Movement for Climate Justice (PMCJ) Mindanao nga kasuhan ug mapanubag sa balaod ang mga nalambigit sa giingong korapsyon sa mga proyektong flood control sa Department of Public Works and Highways o DPWH.
Gikwestyon ni Pat Jared V. Pangantihon sa PMCJ Mindanao nganong hangtod karon wala pa gihapoy napasakang kaso o napriso, bisan kapin na sa usa ka tuig sukad mabutyag ang maong mga alegasyon.
Matud niya, ang giingong anomalya sa mga proyektong flood control maoy nakatampo sa grabeng pagbaha ug pagkawala sa kinabuhi sa nagkalain-laing lugar, lakip na ang Cebu ug General Santos.
Gitumbok usab niya ang kahimtang sa dalan gikan sa San Fernando, Bukidnon paingon sa Talaingod, Davao del Norte, nga sumala kaniya nahimo nang murag suba tungod sa pagbaha ug naigo sa mga landslide.
