CAGAYAN DE ORO CITY – Sulbad na alang sa kapolisan ang kasong pagtulis-patay sa ‘grab driver’ nga gitabanga’g dunggab sa tulo ka lalaki diha sa coastal road,Brgy Lapasan ning syudad.
Kini human madakpi ang usa sa tulo ka responsable nga si Erwin Adame nga unang positibo nga gitudlo nga kabahin sa midunggab-patay sa biktima nga si Cris Semaña,24 anyos,ulitawo nga residente sa Western Kolambog sa miaging kadlawon.
Gibutyag ni Agora Police Station deputy commander Lt Macario Linog nga kasong robbery with homicide ang napasaka batok kang Adame ug laing duha ka kauban niini nga pabiling nila nga gipangita.
Gihulat pa usab nila ang resulta sa medico legal kabahin sa alegasyon nga gilugos sa mga suspek ang menor de edad nga hiniguga ni Semaña samtang nag-date-date sila sa maong lugar sa miaging kadlawon.
Dugtong usab niini,mopasar sa resolusyon o ordinansa ang konseho aron ipaubos sa ‘no man’s land’ ang coastal area ug butangan usab sa outpost sa Brgy Lapasan ning syudad.
Kini maoy nakit-ang sulbad ni Lapasan Punong Brgy Julieto Ogsimer aron dili na masubli nga dunay tulison ug patyon nga mag-date-date sa maong lugar.
Gibutyag ni Ogsimer nga dugay na sila naghangyo sa DPWH nga mabutanga’g suga ang lugar apan namatay na lang si Cris Semaña,hangtod poste lang ang napatindog sa maong lugar.
