CAGAYAN DE ORO CITY – Miggawas sa imbestigasyon sa kapolisan nga walay kamatooran ang alegasyon sa 17-anyos nga estudyante nga siya gipugos pagpasakay sa pribado nga sakyanan gawas sa ilang tunghaan sa Maramag, Bukidnon ug gidala sa Cagayan de Oro City.
Miingon si Maramag Police Station commander Police Maj Gil Agpaoa nga daghang “inconsistencies” sa giluwatang pahayag ni Kyle Brent Asedilla nga taga- Kitaotao,Bukidnon hinungdan nga nagtoo sila nga kidnap me ang gihimo sa estudyante sa Philippine Community College.
Sumala ni Agpaoa nga mikuyog sa iyang mga barkada si Asedilla padulong dinhi sa syudad.
Una nang giangkon ni Agpaoa nga naghatag alarma sa tibook lungsod ang mikatag nga report nga adunay estudyante nga gidagit sa iyang area of responsibility.
Dumduman nga migawas ang report nga nakadagan ang biktima gikan sa iyang abductors dihang ibalhin na unta kini sa laing sakyanan pag-abot sa Brgy Nazareth sa syudad sa miaging semana.
