Nagpasalig si Presidente Ferdinand Marcos Jr., nga mahimong malinawon, organisado ug malampuson ang una nga Bangsamoro Autonomous Region in Muslim Mindanao (BARMM) parliamentary elections sa Setyembre 14, 2026, uban sa tibuok pwersa sa AFP ug PNP aron masiguro ang seguridad sa botohan.
Ang eleksyon ilalom sa Bangsamoro Organic Law magtimaan sa kataposang yugto sa transition period ug maghatag higayon sa mga botante nga mopili sa unang regular nga parlamento sa rehiyon.
Lakip sa mga lakang sa seguridad mao ang gun ban gikan Hulyo 16 hangtod Setyembre 29 ug pagbutang og checkpoints sa tanang lungsod ug siyudad sa BARMM.
Ang Commission on Elections nagkumpirma nga 13 ka partido ang mokompetensya alang sa 80 ka lingkuranan sa parlamento, diin ang parlamento mismo mopili sa Chief Minister.
Gipangayo ni Marcos ang kooperasyon sa tanan aron ang eleksyon mahimong lig-on nga timaan sa kalinaw ug demokrasya sa Bangsamoro.
