Gi-inagurahan ni Presidente Ferdinand Marcos Jr ang pagbukas sa Mabini-Cayacay Small Reservoir Irrigation Project (SRIP) sa Bohol.
Sa iyang pag-atubang sa publiko, gipamugos sa presidente kung unsa ka mahinungdanon ang mga lakang aron matabangan ang kapin sa 700 ka mag-uuma gikan sa lima ka barangay sa Mabini ug Alicia pinaagi sa paghatag sa irigasyon sa 530 ka ektarya nga sakahan.
Tungod sa abunda nga suplay sa tubig, gilauman nga mosaka ang produksyon sa palay ug mga “high-value crops” ug mapadako ang produksyon gikan sa duha ngadto sa katulo ka beses nga pagtanom sa usa ka tuig.
Gawas niini, gibutyag ni Marcos nga gipaspasan usab sa kagamhanan kauban ang National Irrigation Administration (NIA) ang uban pang proyekto sa patubig sa probinsya, sama sa Bunot-bunot SRIP sa Buenavista nga gisaad nga mahuman sulod sa tulo ngadto sa upat ka bulan.
Agig pangandam sa hulga sa grabeng El Niño nga posibleng molungtad pa hangtod sa 2027, gidasig sa presidente ang mga mag-uuma nga magtanom una sa mga alternatibong crops nga dili kaayo moinom og tubig, sama sa pakwan, luya, ube, mani, ug talong.
Gitapos ni Presidente Marcos ang iyang mensahe pinaagi sa pagpasalamat ug pagdayeg sa kakugi sa mga mag-uuma ug sa paningkamot nga dungan nga itukod ang usa ka malambupon ug madasigon nga Bagong Pilipinas.
