CAGAYAN DE ORO CITY, Philippines – Gihimakak ni Iranian President Masoud Pezeshkian nga mipadala sa tag-as nga kalibre sa armas-igugubat ang ilang gobyerno sa Yemen.
Maoy gitumbok ni President Pezeshkian ang ‘hypersonic missiles’ nga unang gidudahan sa Israeli Defense Force (IDF) intelligence report nga nakasulod na sa Yemen ug alang kini sa pagpalig-on sa artillery sa Houthi Militants.
Sa labing unang press conference nga gilusad sa International Media, hugtanong gipanghimakak sa presidente ang mga expose ug pasiatab nga mga opinyon sa mga political experts nga supplier ang Iran sa maong missiles tungod kay daan nang may missile system ang mga Houthis apan dili susama sa ilang kalidad.
Gipalanog sa presidente sa Iran nga nakapalambo sa ilang kaugalingon armas ang Yemen ug dili kini basta-basta nga mga armas.
