Miabot sa kapin ₱31 milyones ang kinatibuk-ang kantidad sa mga ilegal nga droga nga nasakmit sa Police Regional Office 10 atol sa ilang gilusad nga 284 ka anti-drug operations sa tibuok Northern Mindanao niadtong bulan sa Hunyo.
Subay sa opisyal nga taho, mikabat usab sa 321 ka mga indibidwal ang nasikop sa maong operasyon sa maong rehiyon.
Gihulagway ni Regional Director PBGEN Christopher N. Abrahano nga seryoso ang ilang buhatan sa pagguba sa ilegal nga drug trade pinaagi sa gipahugtan nga intelligence-driven operations aron masiguro ang kahapsay sa komunidad.
Ilang gipasalig nga magpabilin silang komitado sa pagpalig-on sa koordinasyon uban sa ubang ahensya aron dugang mapakunhod ang supply sa ginadiling droga ug mapadayon ang kalinaw sa rehiyon.
