Naigo sa dakung technical glitch o pagkawala sa serbisyo ang Microsoft 365, uban sa Outlook ug Teams, nga nakaapekto sa minilyong mga tiggamitan sa Estados Unidos, ning adlaw Biyernes.
Giangkon sa Microsoft nga naglisod sa pag-access sa ilang mga aplikasyon ang ilang mga kostumer tungod sa maong insidente.
Giklaro hinuon sa kompanya nga nakit-an na nila ang hinungdan sa problema ug gihimo dayon ang tanan aron mabalik sa normal ang sistema.
Tungod sa kalit nga pagka-down sa mga plataporma, daghang trabaho ang nabalinada ug naputol ang komunikasyon sa daghang mga empleyado ug estudyante sa Amerika ug uban bahin kalibutan nga subscribers sa produkto sa Microsoft.
Padayon pang gimonitor sa mga eksperto sa Microsoft ang kahimtang sa ilang mga serbisyo aron masigurong dili na kini masubli.
