Gikuwestiyon ni Davao 1st District Rep. Paolo “Pulong” Duterte ang pamahayag ni Defense Secretary Gilbert Teodoro Jr. nga dapat na mukanaog sa pwesto kadtong mga opisyales sa gobyerno nga gadapig sa China mahitungod sa hisgutanan sa West Philippine Sea (WPS).
Sa gipagawas nga pahayag sa kongresista niadtong sabado, nag-ingon kini nga ang mando sa mga galingkod nga opisyal kay nagagikan sa katawhang Pilipino ug kung adunay gitoohang kalapasan sa balaod ang mga opisyal dapat lamang nga muagi kini sa legal nga proseso ug dili sa pagkanaog sa pwesto.
Gi-insister ni Duterte nga ang pagkamakinasudnon dili masukod base sa pagkaprangka sa pagsulti kabahin sa hisgutanan sa West Philippine Sea ug walay tabang ang “pag-demonize” sa Beijing tungod kay dili lamang nasud sa China ang gasuway ug ilog sa giawayang kadagatan.
Gihatagan pud og gibug-aton sa kongresista nga ang nag unang tahas ni Teodoro mao ang pagpalig-on sa depensa sa nasud ug dili ang paghukom sa kamatinud-anon sa mga opisyales nga anaa sa pwesto.
Ang magbabalaod nanawagan usab sa mga sakop sa Armed Forces of the Philippines (AFP) nga magpabiling nakatutok sa ilang mga tahas sa pagpanalipod sa nasud ug dili magpadala sa mga panagbangi nga personal nga mga bikil sa pipili ka opisyal sa gobyerno.
Mibawos usab si Teodoro sa pag-ingon nga ang iyahang gihisgutan kay ang obligasyon sa mga opisyal nga musunod sa naglungtad nga balaod ug palisiya sa gobyerno.
Gipasabot usab niya nga ang Administrative Order No. 29 nga gipagawas kaniadtong 2012 nga nagmando sa kadagatang kasadpang isip bahin sa pilipinas nga gihimo sa nasud ug nagpabilin pa gihapon epektibo hangtud dili kini bawion o ipawalay-bili sa korte. (raniel mahunyag)
