Nahimong sentro sa atensyon ang drag artist nga si Pura Luka Vega human kini nanguna sa sakramento sa komunyon atol sa misa sa Open Table Metropolitan Community Church sa San Juan City niadtong milabay nga Domingo.
Ang maong simbahan usa ka ecumenical nga institusyon nga naghatag og espirituhanong suporta alang sa LGBTQIA+ community isip kabahin sa ilang kampanya sa pag-angkon og luna sulod sa relihiyosong pagtuo.
Sa usa ka Facebook post, gipasiugda sa simbahan nga ang “Eucharist” usa ka bukas nga lamesa alang sa tanan, ilabi na alang sa mga marginalized nga sektor sa katilingban.
Kahinumduman nga si Vega nakasinati og dakong kontrobersiya ug pagkaaresto niadtong 2023 tungod sa iyang drag performance sa kantang “Ama Namin,” apan human sa taas nga proseso sa balaod, hingpit na siyang naabswelto sa tanang kaso niadtong Hunyo 2025.
Kini nga kalihokan nagtimaan sa iyang pagbalik sa aktibong pag-apil sa mga relihiyosong seremonya human sa maong mga legal nga hagit. (jane abulag)
