CAGAYAN DE ORO CITY – Naka-kustodiya na sa kapolisan ang ikaduha gikan sa tulo ka suspek nga giingong milugos sa 17 anyos nga babaye kinsa hinigugma sa grab driver nga brutal gitabanga’g dunggab-patay samtang nag-date sa coastal road sa Brgy Lapasan ning syudad.
Miingon si Agora Police Station deputy commander Lt Ronie Lynn Vedra nga na-aresto si Daniel Peligrino,33-anyos,ulitawo nga taga-Saint John,Brgy Puntod kay giingong positibo kini gitudlo sa rape victim nga maoy milugos kaniya.
Una niini,nagsilbi nga person of interest si Peligrino apan sa dihang gi-presentar kini atubangan sa biktima,wala’y lipud-lipod nga nailhan ug gitumbok siya nga milugos kaniya.
Mismo ang suspected rape victim ang nangayo’g tabang sa kapolisan kay gitabanga’g dunggab sa mga suspek ang iyang hinigugma nga si Cris Semaña sa miaging kadlawon.
Samtang susama robbery with homicide suspect nga si Erwin Adame,kusganong gihimakak usab ni Daniel Peligrino nga may kalambigitan kini sa kamatayon ni Semaña ug paglugos sa hinigugma niini.
Kini ang katin-awan ni Peligrino sa dihang gitudlo siya sa giingong rape victim nga miamung-among kaniya sa miaging kadlawon sa Domingo.
Gibutyag sa suspek nga tinood nga manag-kaila sila si Adame apan wala siya sa oras sa panghitabo kay mismo ang iyang hinigugma nga si ‘Karen’ ang gikauban niini samtang nang-birthday.
Si Peligrino ang kasuhan gihapon sa robbery with homicide ug rape sa piskalya ning adlawa.
