Mipadayag si Gov. Henry Oaminal, chairman sa Regional Development Council (RDC‑10), nga padayon ang ilang paningkamot nga mapataas ang pondo nga igahatag sa Mindanao sa national budget, base sa kusog nga kontribusyon sa rehiyon sa Gross Domestic Product (GDP) sa nasud.
Matod ni Oaminal, ang Northern Mindanao ug ubang bahin sa Mindanao maoy ikaduha nga dakong contributor sa GDP sa Pilipinas, apan 15 porsyento ra ang ilang nadawat gikan sa General Appropriations Act.
Dugang pa niya, ang rehiyon nag‑amot og 21 porsyento sa GDP samtang nagrepresentar sa 26 ka milyon nga populasyon, maong giingon niya nga dili patas ang kasamtangang budget allocation.
Gipunting usab niini ang tabang sa mga regional line agencies ug economic development offices nga nagpalig‑on sa implementasyon sa mga programa ug proyekto sa rehiyon.
Busa target, matod pa sa RDC‑10, nga mapataas ang budget share sa Mindanao ngadto sa 21 hangtod 22 porsyento aron mas mapaspas ang kalamboan sa rehiyon.
