Suportado sa Regional Development Council (RDC‑10) ang planong pagpatukod og international port sa Sultan Naga Dimaporo, Lanao del Norte aron mapalambo ang koneksyon sa Northern Mindanao ngadto sa Brunei, Indonesia ug Malaysia, sumala ni Gov. Henry Oaminal nga chairman sa konseho.
Matod ni Oaminal, ang maong sugyot gikan sa provincial government sa Lanao del Norte nakita sa RDC‑10 nga dakong tabang sa kalihokan sa negosyo, pamaligya ug paglihok sa mga produkto sa rehiyon.
Dugang pa niya, pinaagi sa maong pantalan posible usab nga direkta makapagpasulod og lana gikan sa Malaysia aron maminusan ang gasto ug malikayan ang mga rutang adunay kalibog sa internasyonal nga merkado.
Giingon usab sa gobernador nga sa miaging mga panaghisgot uban sa nagkalain‑laing ahensya, nasuta nga kulang ang kasamtangang koneksyon sa Northern Mindanao, maong gikinahanglan ang bag‑ong imprastraktura.
Busa gitrabaho na karon ang maong proyekto aron madali ang hingpit nga pagpatuman niini uban sa suporta sa mga lokal nga opisyal ug mga kongresista.
