CAGAYAN DE ORO CITY – Nadakpan sa kapolisan ang 55-anyos nga mag-uuma nga miunay pagsunog sa usa ka bata diha sa Purok 7, Segapod, Maigo,Lanao del Norte.
Giila ang suspek nga si Florencio Curay samtang ang biktima mao si Romnick Balde, 2-anyos nga pulos residente sa maong lugar.
Gibutyag ni Maigo Police Station commander Police Lt Baltazar Deguilmo nga hubog ang suspek gikan sa videokehan ug nasuko kini sa iyang uyab nga si Janet Balde kinsa inahan sa bata.
Naglagot ang suspek human mawala ang iyang kuwarta nga nagbalor sa P12,000.00 ug nagtoo nga gikawat kini sa iyang uyab.
Tungod sa kasuko sa suspetsado, gikulata niya ang ginang ug gigguyod paggawas sa videokehan kauban ang 2-anyos nga bata.
Nakapangayo’g tabang sa mga silingan si Janet apan nabilin ang iyang anak ug gisunog sa suspetsado.
Detinado na sa bilangguan si Curay ug mag-atubang sa patong-patong nga kaso.
