CAGAYAN DE ORO CITY – Gihatag ni PNP officer-in-charge chief Lt Gen Archie Francisco Gamboa ang highest medal of honor sa namatay’ng “hero cop” nga si Police Senior Master Sargeant Jason Magno sa Initao, Misamis Oriental.
Nakigduyog si Gamboa sa gibating kasub-anan sa nabilin nga pamilya sa bayaning pulis.
Bitbit ni Gamboa sa pagbisita ang P150-mil burial assistance gikan sa Office of the Presidente, P350-mil gikan sa pondo sa PNP ug laing P75-mil matag bulan nga madawat ni Ginang Vivian Magno isip financial assistance sa ilang pamilya ug pagpa-ekswela sa iyang mga anak.
Libre usab nga makasulod sa PNP Academy ang mga anak ni Magno nga dili na kinahanglan pang mokuha sa entrance exam.
Samtang, wala magdahom si Ginang Vivian Magno nga mapuno sa pagdayeg ang kamatayon sa iyang kapikas nga si Police Senior Master Sargeant Jason Magno.
Kini tungod sa kabayanihan nga nahimo sa pulis bugti sa kaluwasan sa daghang kinabuhi sulod sa Initao Community College sa miaging semana.
Miingon si Magno nga gipamatud-an sa iyang bana ang pagkaligdong niini sa iyang trabaho.
Nahimong emosyonal ang ginang dihang gilab-as niini sa iyang panumduman ang ka-maayong tawo sa iyang kapikas.
Gipasalamatan usab ni Ginang Prinsecita Magno, inahan sa gitawag nga “Hero Cop” sa Initao, si Gamboa.
Personal nga nahimamat ni Magno ang mga kadagkuan sa PNP ug wala kini makatoo nga duawon ang iyang namatay’ng anak.
Miingon ang ginang nga dakug tabang ang pinansyal nga ayuda sa gobyerno kay wala may trabaho ang kapikas ni Magno.
