Gipahayag ni Propesor Danilo Arao ang iyang mga gidahom nga malakip sa umaabot nga State of the Nation Address (SONA) 2026 ni Pangulong Ferdinand “Bongbong” Marcos Jr.
Matod pa niya, angayan nga hatagan og katin-awan sa pangulo kung unsa nay nahitabo sa mga imbistigasyon sa nangaging anomalya, ilabi na ang kontrobersiya sa flood control.
Gawas sa isyu sa korapsyon, gipasiugda usab ni Arao nga kinahanglang mapadangat ang saktong tabang para sa mga biktima sa bagyo ug linog.
Gidugang pa niya nga angay na gyud mahatagan og dinalian nga pagtagad ang dugay nang panawagan sa mga mamumuo alang sa dugang suholan, ingon man ang tinuod nga reporma sa yuta para sa mga mag-uuma ug katutubo.
Sa katapusan, iyang gilatid nga kung tinuod nga kahimtang sa nasod ang i-report ni Marcos Jr., kinahanglan nga duna kini tinawag nga tulubagon sa katawhan taliwala sa kaylap nga kalisod nga giatubang karon. (RIZA BDULAO)
