Gipahayag ni House Prosecutor ug Bicol Saro Partylist Rep. Terry Ridon nga gilauman na gyud sa prosekusyon ang sunod-sunod nga pagbabag o pag-object sa depensa isip kabahin sa ilang estratehiya sa impeachment trial.
Gipasabot niya nga ang pinal nga desisyon kon dawaton o ibasura ba ang maong mga pagsupak nagdepende ra gihapon sa Senado nga maoy impeachment court.
Matod niya, isip usa ka abogado, iyang namatikdan nga adunay mga objection nga nagbalik-balik ug morag wala nay kalabotan sa kaso.
Apan, iyang giklaro nga ilahang girespeto kini nga pamaagi tungod kay trabaho man usab sa mga defense lawyer ang pagpanalipod sa ilang kliyente ug pagsiguro nga dili basta-basta makasulod ang mga ebidensya.
