Nagpahimangno ang lead convenor sa Road Safety Advocate sa tanang motorista ug mga mobiyahe karong panahon sa bakasyon nga mag-amping sa pagmaniho tungod sa kainit sa panahon ug kadaghan sa mga nagbakasyon.
Matod niya, panahon kini sa pagpahulay ug pagpahayahay, busa dili angay magdali sa dalan aron malikayan ang disgrasya.
Giingon usab niya nga kinahanglan hinay-hinayon lamang ang pagmaniho ug magpabiling kalmado bisan daghan ang sakyanan sa karsada.
Ilabi na niyang gipahimangnoan ang mga nagmotorsiklo nga kasagarang molarga sa lagyo, nga siguruhong hapsay ang panglawas ug andam ang sakyanan sa biyahe.
Dugang pa ni Tupag, usa ra ang kinabuhi sa tawo, busa importante nga unahon kanunay ang kaluwasan sa matag panaw.
