CAGAYAN DE ORO CITY, Philippines – Mi-apelar si Pope Francis sa tanan gobyerno, world leaders ug cause oriented groups sa tibook kalibutan nga dili kalimtan ang mga kabus nga padayong nag-antos sa pagpuyo ibabaw sa kalibutan nga walay balay, ug pagkaon.
Gihimo sa Santo Papa ang hangyo alayon sa pagtamod sa World Day of the Poor, kagahapong adlawa.
Sa iyang homiliya iyang gipadumduman ang mga adunahan ug anaa sa gobyerno nga tabangan ang labing kabus nga komonidad ug mahimong ehemplo sa paglaum, sama ni Hesu Kristo nga nahimong paglaum sa katawhan dihang nabulit sa daghang sala sa kalibutan.
Usa sa gikondinar sa Santo Papa ang social media nga maoy nagpabilo sa grabeng kabalaka, kaibog (insecuries) ug pagsabwag kadaot sa katawhan.
Iya usab gihangyo ang tanan katawhan nga mag-ampo aron makahimog maayong aksiyon sa katilingban, sama sa pagtabang sa mga pamilyang pit-os ug walay panginabuhian.
