Nanawagan si Senator Christopher Lawrence “Bong” Go nga undangon na ang hugaw nga pulitika, pagpangdaut ug pagpakaylap sa mga bakam nga naghatag sa dugang pasakit sa katawhan.
Kini maoy tipik sa iyang pamahayag may kalabotan sa mga akusasyon ni Ramil Madriaga batok kang Vice President Sara Duterte atol sa impeachment “mini-trial” sa Kongreso.
Si Go nailhan nga alyado ug suod nga kauban sa pamilya Duterte.
Sa wala pa siya mahimong senador, nagsilbi siya isip legal aide ni kanhi Pangulong Rodrigo Duterte.
Namigos si Go nga ang pulitika kinahanglan magserbisyo sa katawhan ug dili mahimong tinubdan sa kagubot.
Ang iyang panawagan usa ka pahimangno nga ang pagtinabangay ug kamatuoran mao ang mas angay nga iprioridad alang sa nasud.
