Gisaway ni Senator-Judge Erwin Tulfo ang pipila sa iyang mga kaubang senator judge nga mahiligon maglecture panahon sa ilang interjection.
Gihimi ni Tulfo ang pahayag dihang gipangayuan kini’g reaksyon sa BOMBO NEWS TEAM sa ilang pagbalik balik sa pagsulti nga mupadayon na sa hearing tungod kay sayang ang pagdagan sa oras.
Si Tulfo namugos nga bisan pa man sa kagustuhan sa tanan nga mapadali ang proseso sa impeachment trial, kinahanglan gihapon ang grabeng pag-amping sa matag lakang.
Dili daw pwedeng basta-basta lang ang pagproseso tungod kay basin adunay mga importanteng ebidensya ug testimonya nga malaktawan o dili mapasabot ug maayo.
Gipunting usab sa senador nga nag-usik lamang sa oras ang pipila ka mga kaubang senator-judges nga nagahatag pa sa murag “Law 101” nga lektura sa mga abogado sa prosecution ug defense.
Subay niini, iyang gipamugos nga kung adunay sayop, mas maayong direktang punahon ug ipokus na lamang ang pagtul-id niini imbes nga magpalayo pa sa pinaka-isyu.
Gihatagan niya’g pagtagad nga ang paghisgot pa bahin sa mga leksyon sa law school ug uban pang walay kalabutan nga mga butang maoy hinungdan nga nagalangan ang dagan sa pagpaminaw.
Nanawagan si Tulfo nga usabon ang pamaagi pinaagi sa pagtutok na lamang sa tinuod nga mga ebidensya ug testimonya aron mas maging mabungahon ug madasigon ang pagkab-ot sa hustisya
