Gitin-aw ni Senator Imee Marcos nga dili siya supak sa pagtukod sa PAX SILICA sa Pilipinas, ilabina kung makahatag kini og pamuhunan, pag-uswag sa artificial intelligence ug libo-libong trabaho alang sa mga Pilipino.
Apan, iyang giingon nga tun-an pa niya ang dokumentong giaprobahan sa Department of Justice nga daw anaa’y mga probisyon nga mahimong makaapekto sa soberanya ug kontrol sa Pilipinas sa maong hub.
Gikuwestiyon ni Marcos ang gisugyot nga joint venture ug master tenant arrangement alang sa 1,619 ektaryang luna, lakip ang 99-anyos nga lease ug ang pagdumala sa espesyal nga economic zone.
Gipangutana usab niya ang probisyon nga mahimong magpasakop sa mga panaglalis sa New York ug ubos sa US Federal Arbitration Act, samtang iyang giingon nga gikinahanglan lamang nga masusi pag-ayo ang kasabutan aron masiguro nga mapanalipdan ang interes ug soberanya sa Pilipinas. (riza budlao)
