Gisubli ni Senador Robinhood Padilla ang iyang panawagan nga daling ipasar ang Reserve Officers’ Training Corps (ROTC) Act dungan sa pagsaulog sa Adlaw sa Kagawasan gahapong adlawa.
Sumala sa senador, ang nahitabong magnitude 7.8 nga linog sa Mindanao nagpakita sa dako nga panginahanglan sa mga disiplinado ug bansay nga lungsoranon nga makatabang sa panahon sa kalamidad.
Ubos sa Senate Bill No. 617, ipaubos sa mandatory basic ROTC training ang mga tinun-an sa kolehiyo ug mga technical-vocational nga institusyon aron mapalig-on ang kaandamon sa nasod.
Tuyo niini nga bansayon o andamon ang mga kabatan-onan alang sa evacuation, first aid, search and rescue, ug disaster response kung adunay mga emerhensya.
Gihatagan og gibug-aton sa senador nga ang maong balaodnon wala lang magsilbi alang sa depensa sa nasod, kondili alang usab sa paghulma sa mga responsableng lungsuranon nga andam moalagad sa panahon sa kalisod. (riza budlao)
