Gipasalig ni House Speaker Faustino Dy III nga susihon nila pag-ayo ang 2027 national budget aron masiguro nga ang matag piso nga igahin sa gobyerno kay mapuslan sa mga Pilipino.
Sa pormal nga pagdawat sa House of Representatives sa 2027 National Expenditure Program (NEP), miingon si Dy nga sigoroon sa mga magbabalaod nga ang mga katawhang pilipino maoy mahimong sentro sa pagproseso sa maong budget pinaagi sa giya sa tema sa gobyerno nga “People-Centered Growth for an Inclusive and Resilient Future.”
Dugang pa ni Dy, timbang-timbangon nila ang gisugyot nga budget subay sa tulo ka sukarang pangutana: asa padulong ang pondo, unsa nga kongkretong kabag-uhan ang mahatag niini, ug sa unsang paagi kini mabati sa mga ordinaryong pilipino.
Giklaro pud ni Dy nga ang national budget kay labaw pa sa usa ka tipon sa numero ug pondo tungod kay luyo sa matag piso mao ang mga pilipino nga naglaom sa kagamhanan alang sa mas maayong serbisyo, mas daghang oportunidad, ug mas maayong kalidad sa kinabuhi. (raniel mahunyag)
