Samdan sa ulo ang usa ka miyembro sa Philippine Navy human kini gibunalan sa batota sa usa ka personnel sa China Coast Guard (CCG) atol sa usa ka komprontasyon sa Ayungin Shoal sa West Philippine Sea niadtong Lunes.
Nahitabo ang insidente sa dihang agresibong miduol ang walo ka personnel sa CCG sakay sa usa ka rigid-hull inflatable boat aron mokuha og hulagway sa BRP Sierra Madre.
Sa dihang misulay sa pag-abog ang mga tropa sa Armed Forces of the Philippines (AFP) gamit ang rubber boats, kalit silang giatake sa mga Intsik nga miresulta usab sa pagkaguba sa mga maong rubber boats.
Gilayong gitambalan sa Western Command ang nasamdang sundalo, samtang padayong nanawagan ang AFP sa China nga hunongon na ang ilang ilegal, ug agresibong aksyon subay sa 2016 Arbitral Award.
