Gipamugos ni Atty. Jojo Lacanilao nga nagpabilin nga lig-on ug bug-at ang mga testimonya sa mga testigo sa prosekusyon bahin sa kontrobersyal nga pagpanggawas sa minilyon nga pondo gikan sa Office of the Vice President ug DepEd.
Matud sa propesor, klaro nga naestablisar pinaagi sa mga opisyal sa bangko ang tseke ug rekord nga moabot sa ₱112 milyon ang na-withdraw pinaagi sa “unusual” nga gidak-on.
Bisan paman sa pagsuway nga gub-on ang kredibilidad sa mga testigo nga gihimo ni Senator Imee Marcos pinaagi sa pagtudlo sa mga kwestyonableng inconsistencies, gitin-aw sa propesor nga dili kini epektibo tungod kay napakyas ang senadora sa pagpresenta sa opisyal nga transcript of stenographic notes (TSN) sa korte.
Gipadayag usab ni Lacanilao nga dili usab mabalibaran ang talagsaon ug kaduda-dudang pag-withdraw sa timbang nga ₱39.8 milyon kada quarter imbes nga ang naandan ug pormal nga ₱10 milyon lamang.
Tungod sa maong mga ebidensya, dako ang iyang pagtuo nga anaa sa saktong dalan ang prosekusyon sa pagpadayag sa kamatuoran sa maong kaso.
Naglaum usab ang legal expert nga ang Commission on Audit (COA) na ang mosunod nga moatubang isip testigo aron mas mapalig-on pa ang impeachment proceedings.
