Gipahayag sa legal spokesperson sa House prosecution panel nga si Atty. Benjamin Tolosa Jr. dili mahimong ipasa lamang sa Special Disbursing Officer (SDO) ang tanang accountability sa gikuwestiyon nga pag-disburse sa confidential funds sa lain-laing dapit sa nasod sa samang adlaw.
Matud sa prosecution, gibase sa COA-DBM Joint Circular No. 2015-01 ug sa testimonya sa COA-ICFAO auditors nga sila Atty. Roderick Wamil ug Xylene Del Campo, adunay accountability ang ulo sa ahensya sa paggamit sa maong pondo.
Gi-highlight usab sa prosecution ang gitawag nilang “physical impossibility” sa pag-apod-apod sa kuwarta sa lain-laing lugar sa Luzon, Visayas ug Mindanao sulod sa usa ka adlaw pinaagi sa usa ka SDO.
Tungod niini, giingon sa prosecution nga dili lamang ang SDO ang angay susihon, apan apil usab ang papel sa agency head sa pag-aprobar ug pagdumala sa paggamit sa confidential funds. (riza budlao)
