“Tropical Night” mao kini ang paghulagway ni Kimberly Alfaro, usa sa mga Bombo International News Correspondent sa France, sa grabeng kainit nga nasinati karon sa maong nasud tungod sa mas grabe ug mas dugay nga heat wave karong tuiga.
Matud pa ni Alfaro, kon itandi sa miaging mga tuig diin pipila lamang ka adlaw ang gidugayon sa heat wave, karon miabot na kini og pipila ka semana.
Buntag pa lang, taas na dayon ang temperatura, hinungdan nga mabati na ang grabeng kainit sulod sa tibuok adlaw.
Bisan sa kagabhion, wala gihapon mohupay ang kainit tungod kay nagpabiling taas ang temperatura.
Mao kini ang gitawag nga “tropical night,” diin bisan gabii na, init gihapon ang panahon ug dili mobugnaw sama sa naandan.
Nagpakita kini nga lahi ug mas grabe ang kahimtang sa panahon nga giatubang karon sa France, diin mas dugay ang heat wave ug mas dako ang epekto niini sa adlaw-adlaw nga panginabuhi sa mga residente.
